APA-nın Baş Dövlət Yol Polisi İdarəsinin saytına istinadən verdiyi məlumata görə, Daxili İşlər Nazirliyi rəhbərliyinin müvafiq göstərişinə əsasən yeni dərs ilinin başlanması ilə əlaqədar 2012-ci il sentyabr ayının 10-dan, oktyabr ayının 10-dək respublika ərazisində «Diqqət, uşaqlar!» adı altında hərəkətin təhlükəsizliyi aylığı keçiriləcək.

Tədbirin keçirilməsinin əsas məqsədi uşaq və yeniyetmələrin iştirakı ilə yol-nəqliyyat hadisələrinin qarşısının alınması istiqamətində profilaktiki tədbirlərin gücləndirilməsi, habelə ümumtəhsil məktəblərində şagirdlərə təhlükəsiz davranış vərdişlərinin aşılanması və tədris prosesinin effektliyinin yüksəldilməsinə dövlət yol polisinin köməyinin artırılmasıdır.

Bakı Uşaq Teatrı bu il mövsümə həmişəkindən tez start verib. Avqustun 27-də Teatr Narkomanlığa  və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası, Azərbaycan Respublikasının Gənclər və İdman Nazirliyinin sifarişi ilə Arzu Soltanın eyniadlı əsəri əsasında səhnələşdirilmiş “Həyatla oyun” tamaşasıni Lənkəran şəhərinin sakinlərinə təqdim edib. Hər iki təşkilatın rəhbərliyi ilə qastrola çıxan teatr “Həyatla oyun” tamaşası ilə Masallı, Gəncə,Yevlax şəhərlərində çıxış etməyi planlaşdırıb.

Polşa Respublikasının Bakıdakı səfiri Mixal Labendanın təşəbbüsü ilə Azərbaycanlı məcburi köçkün ailələrindən olan uşaqlar Polşaya yay düşərgəsində olublar. Polşanın Azərbaycandakı səfirliyindən APA-ya verilən məlumata görə, bu, cari ildə Larisa Reyxrudel (Azərbaycanın Yəhudi Qadınlar Humanitar Asossiasiyasının Prezidenti ), Malopolska Maarifləndirmə Təşkilatı (http://www.mto.org.pl) və STRABAG S.A. şirkətinin mühüm yardımı ilə təşkil olunan ikinci düşərgədir. 

2012-2013-cü tədris ilində Azərbaycanın ümumi təhsil məktəblərinin I siniflərinə 130454 şagirdin qəbul olunacağı proqnozlaşdırılır. Təhsil Nazirliyinin mətbuat xidmətindən APA-ya verilən xəbərə görə, ötən dərs ilində I sinif şagirdlərinin sayı 125408 nəfər olub. Bu göstərici 2010-2011-ci tədris ilində 120032 nəfər təşkil edib. 

Yeni tədris ilində Bakı şəhərindəki ümumi təhsil məktəblərinin I siniflərinə 36102 şagirdin qəbulu gözlənilir. Ötən tədris ilində bu göstərici 35509 nəfər olub.

«ELS» Müstəqil Araşdırmalar Mərkəzi “Aktual qonaq” verilişinin qonağı oldu

“Təəssüflər olsun ki, Azərbaycanın efir məkanında son illər uşaq verilişləri ilə bağlı müsbət dəyişikliklər müşahidə olunmur”. Bunu avqustun 29-da “Xəzər” TV-in canlı efirinda “ELS” Müstəqil Araşdırmalar Mərkəzinin rəhbəri İradə Yaqubova bildirib. Onun sözlərinə görə, artıq 2 ildir ki, rəhbərlik etdiyi qurum bu aktual problemi araşdırır və çıxış yolları axtarır. Çoxsaylı sorğu və monitorinqlər, ictimai müzakələr, dövlət başçısına qəbul olunan müraciətlər, o cümlədən “Uşaq Telekanalı”nın yaradılması ilə bağlı təkliflər paketi bu problemin aradan qaldırılacağına dair ümid verir.

"ELS" Müstəqil Araşdırmalar Mərkəzi “Mənəvi sərvətimiz” adlı silsilə görüşlərə start verdi

İyulun 19-da "ELS" Müstəqil Araşdırmalar Mərkəzi Azərbaycanın tanınmış incəsənət və ictimai xadimləri ilə “Mənəvi sərvətimiz” adlı silsilə görüşləri çərçivəsində Azərbaycanın xalq şairi Vahid Əzizlə  Firidun bəy Köçərli adına Respublika Uşaq Kitabxanasında görüş keçirmişdir.

Slavyan Universitetinin tələbələri, QHT təmsilçiləri və KİV əməkdaşlarının qatıldığı tədbirdə qonaqları salamlayan Respublika Uşaq Kitabxanasının direktoru Fizurə Quliyeva şair Vahid Əzizin keçdiyi həyat və yaradıcılıq yolundan söhbət açdı. Onun  sözlərinə görə, Vahid Əzizin bütün misralarında əsas xətti məhəbbət və ülvi hisslər təşkil edir, bu da onun zəngin daxili aləmindən xəbər verir.

FOTOQALEREYA