“Təhsil Nazirliyi dərs ilinin uzadılması ilə bağlı hökumətə müraciət hazırlayır. Ehtimal var ki, dərs ili 2 həftəyə qədər uzadılacaq”. Bu açıqlamanı APATV-də yayımlanan "Sosium" verilişinin qonağı olan Təhsil Nazirliyinin ümumi təhsil şöbəsinin müdiri Firudin Həmzəyev verib. Onun sözlərinə görə əksər ölkələrdə dərs ilinin müddəti 9-10 aydır: “Bizdə tədris ili cəmi 32 həftədir. Bu, çox azdır. Biri var eyni proqramı 8 aya öyrənəsən, bir də var  9 aya. Bu qərar hələ verilməyib. Hökumətə müraciət edəcəyik. Dərs ili maksimim iki həftə artırılacaq".

Bu gün Azərbaycanın Şuşa şəhərinin ermənilər tərəfindən işğal olunmasından 22 il ötür. APA-nın məlumatına görə, Azərbaycanın bu qədim, zəngin tarixə və mədəniyyətə malik şəhərinin Ermənistan Silahlı Qüvvələri tərəfindən ələ keçirilməsi ilə Dağlıq Qarabağın işğalı başa çatdırılıb.

Bəstəkar və pedaqoq Oqtay Rəcəbov növbəti baharını qeyd edir

Rusiya Pedaqoji və Sosial Elmlər Akademiyasının həqiqi  üzvü, professor, bəstəkar və pedaqoq, uşaq mahnılarının mahir yaradıcısı kimi tanınan Oqtay Rəcəbov bu gün 73 yaşını qeyd edir. “Anam Azərbaycan”. “Nəğmələr”, “Necə unudum səni?”, “Zəfəran”, “Daha nə istəyirsən” mahnıları ilə xalqın ürəyinə yol tapmış, Azərbaycan mədəniyyətini, musiqisini dünyaya tanıtmış sənətkar eyni zamanda uşaqlar üçün də musiqi əsərləri yazmış və  bu gün ümumtəhsil məktəblərində tədris olunan bir çox musiqi dərsliklərinin müəllifidir.

Nazirlər Kabineti “Xəstə və xəstələnmə riski olan uşaqlar üçün müalicə-sağlamlaşdırıcı tədbirlərin həyata keçirilməsi Qaydası”nı təsdiqləyib. APA-nın verdiyi məlumata görə, Qaydaya əsasən, xəstə və xəstələnmə riski olan uşaqlar üçün müalicə-sağlamlaşdırıcı tədbirlər icbari dispanserizasiyanı həyata keçirən dövlət tibb müəssisəsi tərəfindən təşkil olunacaq.

Azərbaycanın keçiriləcək buraxılış və qəbul imtahanlarının vaxtı açıqlanıb. APA-nın xəbərinə görə, Tələbə Qəbulu üzrə Dövlət Komissiyasının (TQDK) sədri Məleykə Abbaszadə bu gün keçirdiyi mətbuat konfransında deyib ki, buraxılış imtahanları 1-ci istiqamət üzrə iyunun 8-də, 2-ci istiqamət üzrə iyunun 13-də, 3-cü istiqamət üzrə iyunun 18-də , 4-cü istiqamət üzrə iyunun 24-də keçiriləcək. Eksternat buraxılış imtahanları isə iyunun 29-da olacaq.

Azərbaycanda “Təhsil müəssisələrində şagirdlərin sinifdən sinfə keçirilməsi haqqında” Müvəqqəti Qaydalar təsdiq olunub. APA-nın xəbərinə görə, bu barədə Təhsil Nazirliyinin QHT və KİV-lə İş sektorunun müdiri Cəsarət Valehov bu gün keçirilən mətbuat konfransında məlumat verib.