Bu il Azərbaycanda yeni tədris ili sentyabrın 16-da başlayacaq

APA-nın xəbərinə görə, təhsil naziri Mikayıl Cabbarov Təhsil Nazirliyinin rəsmi Facebook səhifəsindəki suallar əsasında verdiyi müsahibəsində deyib ki, bu məsələyə dair qərar birmənalıdır. Lakin təhsil naziri 3 ay yarım yay tətilinin şagirdlərin istirahət üçün çox uzun müddət olduğunu deyib.

Standartlaşdırma, Metrologiya və Patent üzrə Dövlət Komitəsi məktəbli formaları ilə bağlı məlumat açıqlayıb. Komitədən APA-ya daxil olan məlumatda bildirilir ki, komitəyə valideynlər tərəfindən məktəbli formalarının keyfiyyəti və təhlükəsizliyi barədə çoxsaylı müraciətlər gəlməkdədir. Belə ki, son günlərdə Bakı şəhərinin bir neçə ünvanında saxta əmtəə nişanlı, keyfiyyətsiz məktəbli formalarının satışının aşkar olunması və bunun qarşısının alınması istiqamətində görülmüş tədbirlərlə əlaqədar istehlakçılar məktəbli geyimlərinin istehsalı ilə məşğul olan təsərrüfat subyektləri barədə məlumatlar əldə etmək istəyirlər.

Bu gün Azərbaycanın məşhur dirijor və bəstəkarı Niyazi Tağızadə-Hacıbəyovun doğum günüdür. O, 1912-ci il avqustun 20-də Tbilisi şəhərində anadan olmuşdur. Azərbaycan dirijorluq məktəbinin formalaşması və inkişafı məhz Niyazinin adı ilə bağlıdır. Üzeyir Hacıbəyovun "Koroğlu", Qara Qarayevin və Cövdət Hacıyevin "Vətən", Fikrət Əmirovun "Sevil" operalarının, Arif Məlikovun "Məhəbbət əfsanəsi" baletinin dirijorluğunu da Niyazi etmişdir.

Təhsil Nazirliyi bu il birinci sinfə gedəcək şagirdlərin sayını açıqlayıb. APA-nın Təhsil Nazirliyinin saytına istinadən verdiyi məlumata görə, 2013-2014-cü tədris ilində ümumi  təhsil məktəblərində I sinfə gedəcək şagirdlərin gözlənilən sayı 141 166 nəfərdir. Onlardan 74 998 nəfəri oğlan, 66 168 nəfəri qızdır.

2012-2013-cü tədris ilində isə ümumi təhsil məktəblərində I sinif şagirdlərinin faktiki sayı 135 541 nəfər olub (73 182 oğlan, 62 359 qız).

Avqustun 2-dən 12-dək Macarıstanın Döndöş şəhərində XIII Beynəlxalq folklor festivalı keçirilib. Builki festivalda Macarıstan, Serbiya, Braziliya, Gürcüstan, Panama, Polşa, Yunanıstan, İndoneziya, Kolumbiya, Çin və Fransanın musiqi və rəqs ansamblları iştirak edib.

Musiqi festivalında ölkəmizi "Təbəssüm" Usaq Musiqili Teatrı təmsil edib. Festivalın proqramlarında və qala-konsertdə çıxış etməklə yanaşı, Döndöş və Budapeştdə də konsertlər verilib. Eyni zamanda, avqustun 10-da Döndöşdə "Azərbaycan gecəsi" keçirilib.

Qeyd edək ki, Macarıstanın Döndöş şəhəri Azərbaycanın Şuşa şəhəri ilə qardaşlaşmış şəhərlərdir.

"Təhsil haqqında" Azərbaycan Respublikası Qanununa əsasən məktəbə qəbul 6 yaşdan başlanır. Eyni zamanda, dərs ilinin başlanmasına qədər 6 yaşı tamam olmamış xüsusi istedadı ilə seçilən uşaqlar valideynlərin arzusu ilə Təhsil Nazirliyinin müəyyən etdiyi qaydada vaxtından əvvəl məktəbə qəbul oluna bilərlər. Təhsil Nazirliyindən APA-ya verilən xəbərə görə, bununla nazirlik tərəfindən yeni qaydalar təsdiq edilib.

Bu qaydalara əsasən, vaxtından əvvəl I sinfə qəbul həmin il sentyabrın 16-dan dekabrın 31-dək 6 yaşı tamam olan xüsusi istedadlı uşaqlara şamil ediləcək. İstedadlı uşaqların seçim hüququ yerli təhsil şöbələrinə verilib və bu məqsədlə yüksək ixtisaslı və təcrübəli mütəxəssislərdən - ibtidai sinif müəllimi, həkim, psixoloq və metodistlərdən ibarət komissiyaların yaradılması nəzərdə tutulub. Komissiyaya yerli təhsil şöbələrinin müdirləri rəhbərlik edəcəklər.