Studiyanın qonaqları, “ELS-Müstəqil Araşdırmalar Mərkəzi” İctimai Birliyinin sədri, layihənin rəhbəri İradə Yaqubova, AR Prezidenti yanında “Bilik” Fondunun sektor müdiri Xatirə Hüseynova, Təhsil Nazirliyi yanında Peşə Təhsili üzrə Dövlət Agentliyinin baş məsləhətçisi Məcid Bayramov və 18 saylı Peşə Liseyinin müdiri Rəhim Ağamalıyev idi.

Peşə seçimi insanların həyatında verdiyi ən vacib qərarlardan biridir və sözsüz ki, hər birimizi hansı peşəni seçəcəyimiz və bununla gələcək fəaliyyətimizin uğurlu olub-olmayacağına dair fikirlər düşündürür. Peşə insanın gələcəyini müəyyənləşdirir və onun rolu insan həyatında çox önəmlidir.Belə qənaətdə olan İ.Yaqubova sentyabr ayında layihə çərçivəsində reallaşan sosioloji araşdırmanın nəticələrini açıqlayarkən, ali təddris ocaqlarında təhsil alan gənclərin ixtisas seçiminə təsir edən amillər sırasında daha çox peşənin dəbdə olması, peşəyə tələbat və s. qeyd etdiklərini bildirdi. Onun sözlərinə görə, peşə seçimini gənclər daha çox valideynlərin məsləhəti və bir çox hallarda təkidi ilə edirlər, bir qayda olaraq da peşə ixtisas məktəblərinə deyil, ali müəəsisələrə üz tuturlar. “Bugünkü mövzu Azərbaycanda peşə təhsili ilə bağlı islahatlar və imkanlar barədə valideynlərin məlumatlandırılması və övladlarının düzgün istiqamətə yönləndirməsini nəzərdə tutur”, - deyə layihə rəhbəru vurğuladı.

X.Hüseynovanın qənaətinə görə,peşə seçimi gənclərin sonrakı həyatında dönüş nöqtəsi yarada bilər və bu məsələdə cəmiyyətin, insanın yaşadığı mühitin də rolu böyükdür. 3 ilə yaxındır ki, AR Prezidentinin sərəncamı ilə yaradılan Bilik Fondu Azərbaycanın bütün rayonlarında maarifləndirici layihələr həyata keçirir. Artıq bir sıra bölgələrdə Bilik Evləri açılıb ki, orada gənclərin peşə seçimi ilə bağlı maarifləndirildirici kurslar təşkil olunur. Məsələn, sosial sifariş və ali təhsildən kənarda qalangənclərin müraciəti əsasında Nardaranda xalçaçılıq və avtomobil təmiri üzrə mütəxəssis, Şəkidə toxuculuq, digər bölgələrdə isə xarici dil kursları açılmışdır. 

M.Bayramov hazırda peşə təhsilinin plan və proqramlar üzrə, yəni beş istiqamətdə aparıldığını dilə gətirdi. Onun sözlərinə görə, ölkədə peşə təhsilinin nüfuzunun çox aşağı olması və valideynlərin uşaqların seçiminə güclü təsir etməsi səbəbindən valideynlərlə peşə seçimi ilə bağlı maarifləndirici işlərin aparılması nəzərdə tutulmuşdur.

R. Ağamaliyevin sözlərinə görə,5-7 il əvvəl peşə liseylərinə uşaqlar təsadüfən gəlirdisə, hazırda onlarınəksəriyyəti bu seçimi məqsədyönlü şəkildə edirlər. Onun sözlərinə, bazar iqtisadiyyatı dövründə vəziyyət bir qədər dəyişib və ailələr bu gün övladlarını daha çox peşəyə, sənətə  istiqamətləndirməyə başlayıb.

Canlı efirə qoşulan tamaşaçılar veriliş boyu mövzuya dair öz fikir və təklifləri ilə bölüşüblər.

Qeyd edək ki, bu mövzu ilə “ELS” Müstəqil Araşdırmalar Mərkəzinin həyata keçirdiyi “Ailə, qadın və uşaq problemlərinin həllində milli-mənəvi dəyərlərin rolunun gücləndirilməsi” layihəsi çərçivəsində İctimai Televiziyada müzakirələr başa çatmışdır.