“Addım-addım” verilişində “Ailə institutunun qurulmasında müasir problemlər” mövzusu ekspertlər, “ELS-Müstəqil Araşdırmalar Mərkəzi” İctimai Birliyinin sədri, layihənin rəhbəri İradə Yaqubova, APU-nun kafedra müdiri, professor Minarə Dadaşova, ilahiyyatçi İrşad Mahmudov və psixoloq Lümunət Əmrahlı tərəfindən birgə müzakirə olundu.  

“İstənilən peşəyə sahib olmaq üçün diplom almaq lazım gəldiyi halda, valideyn olmaq üçün diplom yox, sadəcə qanunvericilikdə nəzərdə tutulmuş yaş həddindən sonra ailə qurmaq kifayətdir. Lakin müqəddəs varlıq olan ailə qurmaq üçün müəyyən təcrübə və biliklərin olması çox vacibdir”, - deyən İ.Yaqubova məhz bununla bağlı sentyabr ayında ölkənin 21 ali təhsil müəssisəsinin 1050 tələbəsi arasında layihə çərçivəsində aparılmış sorğuda bugünkü mövzuya aid də sualların yer aldığını bildirdi. Onun sözlərinə görə, gənclərin maraqlı və bəzi hallarda gözlənilməz cavabları müəyyən problemlərin ortaya çıxdığını göstərir. Söhbət yalnız dini nigaha, yaxud vətəndaş nigahına üstünlük verən gənclərdən gedir. İlahiyyatçi İrşad Mahmudov qloballaşan dünyada milli dəyərlərin qorunmasının zəruri olduğunu qeyd etdi. Onun sözlərinə görə, bu gün ata-ana, qaynana-gəlin, qaynana-kürəkən problemi var ki, bu da bir çox hallarda ölkədə sürətlə artan boşanmalara gətirir. Professor Minarə Dadaşovanın qənaətinə görə, ailə müqəddəsdir və sözsüz ki məhəbbət üzərində qurulmalıdır, lakin ailənin davamlı olması üçün tərbiyə, hörmət, dözümlülük kimi amillərin olması vacib şərtdir. Psixoloq Lümunət Əmrahlı qloballaşma dövründə cəmiyyətlər, insanların dəyişdiyini dilə gətirdi və ailə dəyərləri məsələsinə gənclərin yanaşmasında təəccüblü bir şeyin olmadığını dedi. “Burada bir sıra psixoloji məqamlar var və demək olmaz ki, həmin gənclər artıq ailə qurarkən özlərini verdikləri cavablardan fərqli aparmayacaqlar” - deyən psixoloqun fikrincə, gənclər ailə qurana qədər bir-birini tanımalı, uyğunlaşmalıdır, amma təəssüflər olsun ki, cəmiyyətdə bu, birmənalı qarşılanmır. O, nəyə görə İslamda olmayan tabular cəmiyyətə gətirilib? - sualını verdi.

“Addım-addım” verilişinin canlı efiri ekspertlərin maraqlı fikir və yanaşmaları ilə bir saat davam etdi.