Təkliflərə görə, çoxuşaqlı ailə dedikdə, övladlığa götürülən uşaqlar da daxil olmaqla, tərkibində 5 və daha çox 18 yaşına qədər, habelə 3 və daha çox əkiz uşaqları olan və onları 18 yaşınadək tərbiyə edən ailə nəzərdə tutulur. Buna baxmayaraq, müzakirələr zamanı göstərilən say tərkibində müvafiq dəyişikliklər də oluna bilər. Qanuna edilən təkliflərdə nəzərdə tutulur ki, çoxuşaqlı ailələrin uşaqları dövlət ali və orta ixtisas məktəblərinin ödənişli fakültələrində güzəştli əsaslarla təhsil almaq imkanı qazanacaqlar. Həmçinin uşaqların məktəbdənkənar təhsil müəssisələrində pulsuz əsaslarla əlavə təhsil alması, bütün təhsil dövründə dərs ləvazimatları, məktəbli və idman formaları ilə pulsuz təmin olunması, bu ailələrin uşaqlarına 6 yaşadək həkim resepti ilə alınan dərmanların pulsuz verilməsi, nəqliyyatdan istifadəyə görə kompensasiya verilməsi, istirahət, mədəniyyət obyektlərinə pulsuz göndəriş verilməsi təklif olunur. Əyani təhsil alan uşaqlar təhsilini bitirənə qədər, lakin 23 yaşdan çox olmamaq şərti ilə, çağırış üzrə həqiqi hərbi xidmətdə olanlar xidmət müddəti bitənə qədər bu kateqoriyaya daxil ediləcək.

Qeyd edək ki, hazırda Milli Məclisin Sosial siyasət komitəsində Dövlət Komitəsi ilə birgə hazırlanan qanun layihəsinə yeni təkliflərin olması da gözlənilir. Layihə bu ilin sonuna kimi Milli Məclisdə müzakirəyə çıxarılacaq.