Yazıçı, publisist, dramaturq, esseist Yusif Abbas oğlu Kərimov 1940-cı il iyulun 1-də Bərdə şəhərində anadan olmuşdur. 1962-ci ildə Azərbaycan Dövlət Universitetinin jurnalistika şöbəsini bitirmişdir. ”Bakı” axşam qəzetində şöbə müdiri, AzTV-də baş redaktor, “Azərbaycan gəncləri” qəzetinin redaktoru, Mərkəzi Seçki Komissiyasında və bir sıra dövlət qurumlarında mətbuat katibi vəzifəsində çalışmışdır. Əməkdar jurnalist Yusif Kərimov hazırda Milli Aviasiya Akademiyasında ictimaiyyətlə əlaqə xidmətinın əməkdaşı, habelə Respublika Mətbuat Şurası nəzdində fəaliyyət ğöstərən Ahıl Jurnalistlər Məclisinin sədri vəzifələrində çalışır.

   Azərbaycan ədəbiyyatında özünəməxsus dəst-xətti olan Yusif Kərimov 1978-ci ildən Yazıçılar Birliyinin üzvüdür. Dörd seçki dalbadal Yazıçılar Birliyi Təftiş Komissiyasının sədri seçilmişdir. Dəfələrlə yaradıcılıq müsabiqələrində qalib gəlmiş, jurnalistika sahəsində “Qızıl qələm” mükafatına (1975), “Səni mənə verməzlər...” romanına görə isə Yazıçılar Birliyinin “Yaddaş” Milli Mükafatına (2003) layiq görülmüşdür.

    Y.Kərimovun indiyədək “Yollar..” (1969), “Bir buta gül” (1972), “Tavridada şimşək çaxır” (1977), “Üçbucaq” (1979), “Gün ötər, geri dönməz” (1984), “Qırmızı sahil” (1988), “Kəpənək ömrü” (1994), “Pərişan eşqim” (1998), “İtgilər və ümidlər” (1999), “İçimə açılan pəncərə” (2003), “Qarabağ şikəstəsi” (2003), “Sarı sim...” (2004), “Çalarlar” (2005), “Zülmətin bəyaz rəngləri” (2005), “Bakirələr xiyabanı” (2006), “Əbədiyyət yolu” (2010) kitabları nəşr olunmuşdur. “Ömür adlı yol keçdim...” kitabı nəşrə hazırlanır. Yeni kitabda müəllifin son illərdə mətbuatda çap etdirdiyi publisistik yazıları ilə yanaşı, “Mənim bestsellerim” silsiləsindən olan bədii əsərlərindən nümunələr  də yer almışdır.

   Yazıçı Y.Kərimov yaradıcılığında uşaqları və yeniyetmələri də unutmamışdır. Müxtəlif  illərdə qələmə aldığı “Lalə və kəpənək”, “Lətifənin xoruzu”, “Lift”, “Fərhadın qoçaqlığı”, “Balaca toplan”, “Fəridənin albomu”, “Fidanın nağılları”, “Səbinənin ürəyi”, “Qırxpilləkəndə döyüş”,  “Erməni şikəstəsi”, “Bakıda ...Xarı bülbül”, “Tarın döyüşü”,  “Havayozanlar” hekayələri, həmçinin  Heydər Öndərə həsr olunmuş “Çıraqçı, çırağı yandır”, “Çapar, köhləni qaytar”, “Sarvan, karvanı mənzilə çatdır” və b. esseləri oxucular tərəfindən rəğbətlə qarşılanmışdır...

   Tanınmış yazıçı-publisistin yaradıcılığı bu gün də məhsuldarlığıilə seçilir.