Millət vəkilinin dediyinə görə, bu qayğı bütün istiqamətləri - təhsil, idman və sairəni əhatə etməklə yanaşı, dövlət tərəfindən, xüsusilə də uşaq hüquqlarının müdafiəsi və təbliğinə böyük diqqət yetirilir: “Ölkədə uşaqlara qarşı zorakılıqla bağlı həm dövlət, həm də ictimaiyyət tərəfindən ciddi addımlar atılmaqdadır. Uşaqlar həm dövlətin, həm də cəmiyyətin qayğısı ilə əhatə olunub. Avropa Şurasının dünyada uşaqlara qarşı zorakılıq halları ilə mübarizə istiqamətində reallaşdırdığı “Hər beşdən biri” kampaniyası ölkəmizdə uğurla aparılır və dövlət tərəfindən dəstəklənir”.

Hesabat zamanı o da qeyd olunub ki, 2012-çi il ərzində  bu sahə üzrə ölkəmizdəki parlament əlaqələndiricisi S. Fətəliyevanin təşəbbüsü və Milli Məclisin təşkilatçılığı ilə bir sıra tədbirlər  həyata keçirilib. Belə ki,  Bakı şəhərinin müxtəlif rayonlarında məktəblilərin və əlaqədar təşkilatların iştirakı  ilə “Biz zorakılığa “yox” deyirik” adlı müzakirələr, Milli Məclisdə “Uşaqlara qarşı zorakılıq: Səbəblər və onların qarşısının alınması” mövzusunda konfrans keçirilib. Eləcə də öz təcrübələrini  bölüşmək məqsədi ilə Almaniyadan və Litvadan ekspertlər dəvət olunub,uşaqlarla mövzu ilə əlaqədar müzakirələr aparılıb.

S. Fətəliyeva hesabat zamanı həmçinin, gələcək nəsillər üçün təhlükəsiz həyat qurmağın bizim hər birimizin vəzifəsi və borcu olduğunu  qeyd edib, Azərbaycanda uşaq zorakılığının qarşısının alınmasında milli strategiyanın uğurla həyata keçirildiyini  və mövcud qanunvericiliyin ildən-ilə təkmilləşdirildiyini vurğulayıb.