“Qəribədir ki, ölkəmizdə fəaliyyət göstərən, beynəlxalq müsabiqə və festivallarda ölkəmizi böyük uğurla təmsil edən uşaq mahnı və rəqs kollektivləri, uşaq teatrları və studiyalarının çıxışlarına da efirdə çox az rast gəlmək olur. Uşaq mahnılarının bəstələnməsinə son illərdə maraq xeyli azalmış, cavan bəstəkarlar isə ümumiyyətlə bu sahəyə maraq göstərmirlər”. 

Uşaq mahnılarının dünəninə nəzər salan tədbir iştirakçıları Ü.Hacıbəyov, A.Zeynallı, Q.Hüseynli, S.Rüstəmov, Ə.Cavanşirov, A.Rzayeva, Q.Qarayev, F.Əmirov, T.Quliyev, O.Zülfüqarov, O.Rəcəbovun gənc nəsl üçün yaratdığı musiqi əsərlərinin neçə-neçə nəsl tərəfindən böyük məhəbbətlə ifa olunduğunu və nəinki ölkəmizdə, bütün dünyada tanındığını bildirdilər.

Dəyirmi masada çıxış edən millət vəkili Musa Qasımlı "Necə olur ki 50-60-cı illərdə uşaqlar üçün yazılan əsərləri zövqlə dinləyir və zümzümə edirik, amma son illərin musiqisini yadda saxlamırıq?" Onun fikrincə,  gənc nəslin formalaşmasında mühüm rol oynayan uşaq mahnılarına dövlətin nəzarəti və maliyyə dəstəyi lazımdır.

Bəstəkar Oqtay Zülfüqarov "Əvvəllər AzTV ayda 40 saat uşaq verilişləri yayımlayırdısa, indi efir vaxtı 10 dəfə azaldılıb və cəmi 4 saatdır. Efirlərdə elə xarici mahnılar səslənir ki, nə musiqisi var, nə fakturası", - deyə əlavə etdi. Bəstəkar Rəna Qədimovanın qənaətinə görə, uşaqların maarifləndirilməsi istiqamətində konkret işlər görülməlidir, məsələn, orta məktəblərdə bəstəkarlarla görüşlər keçirilməlidir. Bəstəkar Rəşid Şəfəq səsyazma studiyalarında uşaq mahnılarının yazılması ilə bağlı qarşılaşdığı problemlərdən söhbət açdı. O, “əvvəllər Şur uşaq musiqi nəşriyyatı var idi, Tofiq Quliyev rəhmətə gedəndən sonra isə dağıldı"- deyə əlavə etdi.

Televiziya və radio dalğalarında uşaq mahnılarının çox nadir hallarda səslənməsi iradına cavab olaraq “Space 14 FM” radiosunun baş redaktoru Əhməd Əsgər problemin kökündə iqtisadi durumun olduğunu və bu sahənin gəlir gətirmədiyini etiraf etdi. Onun fikrincə, son zamanlar uşaqlar üçün yeni mahnıların bəstələnməməsinə görə bəstəkarlar qınaq obyektinə çevrilir: “Məgər şer yazan var ki, bəstəkar da musiqi bəstələsin? Bu gün uşaq bağçalarında bayağı mahnılar, məsələn "Can-cana" səslənir”.

Sonda tədbir iştirakçiları uşaqlar üçün musiqi əsərləri yazan bəstəkarların yaradıcılığını cəmiyyətdə bir örnək kimi müxtəlif formalarda (konsertlər, festivallar, kitablar və s.) təbliğ etmək məqsədilə Azərbaycan milli musiqisinin inkişafında mühüm xidmətləri olan, Azərbaycanın ilk qadın bəstəkarı Ağabacı Rzayevanın 100 illik yubileyinin dövlət səviyyəsində qeyd edilməsini təklifi ilə Prezident İlham Əliyevə müraciət etdilər.