Görüşdə ekspert, “ELS” Müstəqil Araşdırmalar Mərkəzinin rəhbəri İradə Yaqubova GMO-lara qarşı çıxanların və onların törətdikləri fəsadları sübut edən araşdırmaların sayının getdikcə artdığını bildirdi. GMO texnologiyalarının yaranması, onların olduğu ərzaqların istifadəsi ilə bağlı problem və risklərdən söhbət açan spiker ərzaq təhlükəsizliyi ilə bağlı gənclərə bəzi məsləhətlər verdi. Onun qənaətinə görə, GMO-lar insan sağlamlığından başqa, ətraf mühitə, torpağa, su hövzələrinə, biomüxtəlifliyə böyük ziyan vura bilər.

Qeyd edək ki, “Yaşıl İçki” ətraf mühitlə maraqlanan insanların birlikdə toplandığı qeyri-rəsmi görüşdür. İlk dəfə Londonda 1989-cu ildə Edvin Daşevski, Paul Skott və dostları tərəfindən ənənə halına gələrək sonralar Birləşmiş Krallığın 51, ABŞ-ın 400 və Kanada, Almaniya, Polşa, İsveç, Hollandiya, Yaponiya, Sinqapur, Kuala Lumpur, Honq-Konq, Manila, Yeni Zenlandiya, Avstraliya, Çili, Puerto Riko, Livan kimi ölkələrin bir çox şəhərlərinə yayılmışdır. Artıq 2011-ci ilin mart ayından etibarən, dünyada 770 Yaşıl İçki nümayəndəliklərinin əsası qoyulmuşdur. Azərbaycanda “Yaşıl İçki” ilk görüşünü 6 sentyabr 2011-ci il tarixində ADA Kitab Mərkəzində həyata keçirmiş və bir ildən artıqdır ki, bu cür görüşlər ənənə halını alıb.