Tədbirdə bildirilib ki, məqsəd yol qəzalarında həlak olanların xatirəsini yad etmək, ailələrinə mənəvi dəstək olmaq, minlərlə uşağın həyatına son qoyan bu bəlanın ağır nəticələrini ictimaiyyətə çatdırmaq, uşaqları yol hərəkəti qaydaları barədə məlumatlandırmaqdır.
Diqqətə çatdırılıb ki, azyaşlıların hərtərəfli inkişafı, sağlam formalaşması üçün dövlət və qeyri-dövlət təşkilatları, təhsil ocaqları, məktəbəqədər tərbiyə müəssisələri ilə ilboyu əlaqəli iş aparılır. Həmçinin uşaq və yeniyetmələrlə müntəzəm olaraq yol hərəkəti qaydaları, elmi-texniki yeniliklər haqqında söhbətlər, praktiki məşğələlər və s. tədbirlər keçirilir. Vurğulanıb ki, ölümlə nəticələnən yol-qəza hadisələrinin əksəriyyəti yol hərəkəti qaydalarının pozulması nəticəsində baş verir. Əsas diqqət təhlükəsiz həyat üçün davranış vərdişlərinin formalaşdırılmasına yönəldilməli və qanunlara riayət edilməlidir.
Sonra mərkəzin yol hərəkəti qaydaları dərnəyinin üzvləri mövzu ilə bağlı fikirlərini bildirib və sürücüləri diqqətli olmağa çağıran müraciətlər səsləndiriblər.
Tədbirdə şagirdlər, valideynlər və KİV nümayəndələri iştirak ediblər.