Layihənin işçi qrupu Azərbaycan Dövlət Akademik Musiqili Teatrında qala-konsertin iştirakçıları olan 2 və 3 saylı Uşaq-Gənclər İnkişaf Mərkəzləri, Respublika İncəsənət Gimnaziyasının mahnı və rəqs kollektivlərinin sonuncu məşqini keçirib.

Qeyd edək ki, iyunun 4-də saat 19.00-da Azərbaycan Dövlət Akademik Musiqili Teatrında Oqtay Zülfüqarovun 90 illiyi ilə bağlı uşaq musiqi kollektivlərinin ifasında tamaşaçılara bəstəkarın sevilən uşaq mahnıları yeni aranjemanda təqdim olunacaq.

Qala-konsertdə rəsmi dövlət qurumlarının təmsilçiləri, tanınmış incəsənət xadimləri, bəstəkarın ailə üzvləri, ictimai təşkilatlar və mətbuat nümayəndələri, və nəhayət, O.Zülfüqarovun ən balaca və sevimli tamaşaçıları iştirak edəcəklər.

Qeyd etmək lazımdır ki, Oqtay Zülfüqarov yaradıcılığında əsas yeri uşaqlar üçün yaratdığı mahnılar tutur. "Telefon", "Qatar", "Ovçu", "Kim sevirsə idmanı?", “Lavaş”, “Sərçə”, “Can nənə” və başqa əsərləri bir çox nəsillər tərəfindən sevilir və gün də aktuallığını itirməmişdir.

O.Zülfüqarov Azərbaycan musiqili mədəniyyət tarixində mühüm yer tutan iki simfoniya, violonçel, fleyta və simfonik orkestr üçün konsertlər, "Şənlən, mənim xalqım" uvertürası, "Pişik və sərçə" opera-nağılı, "Sehrli alma" uşaq baleti, simli kvartet, fortepiano triosu, mahnı və romansların müəllifidir.

Layihənin gedişatı haqqında ətraflı məlumat ELS Müstəqil Araşdırmalar Mərkəzinin els.az və meneviservetimiz.az saytları, həmçinin www.facebook.com/www.els.az/ səhifəsində.