Təqdimatda “ELS” Müstəqil Araşdırmalar Mərkəzinin rəhbəri İradə Yaqubova lahiyə dair görülən işlər, o cümlədən sentyabr ayında Azərbaycanın 21 ali təhsil müəssisəsinin 1050 tələbəsi arasında aparılmış sosioloji araşdırma, İctimai Televiziyanın “Addım-addım” (5 buraxılış) və “Açıq dərs” (1 buraxılış) verilişlərində ekspertlərin iştirakı ilə ümumilikdə 6 mövzu ətrafında müzakirələr və s. haqqında məlumat verdi. Bildirdi ki, 3 ay davam edən layihə zamanı cəmiyyəti narahat edən problemlər və onların həlli yolları araşdırılıb, ekspertlər tamaşaçılarla canlı ünsiyyət zamanı fikir və təklifləri ilə bölüşüblər.

“Açıq dərs” verilişində müzakirə olunan “İxtisas seçiminə ailənin təsiri və rolu” mövzusunun cəmiyyətdə rezonansa səbəb olduğunu deyən İ.Yaqubova bu məsələnin gündəmdə saxlanmasının zəruri olduğunu vurğuladı.

Sonra mövzu ətrafında ictimai müzakirələr başladı. İctimai Televiziyanın rəsmisi Zaur Mahmudov İTV-nın bu cür layihələri dəstəklədiyini vurğuladı, “Açıq dərs” verilişinin aparıcısı Orxan Cabbarov isə peşə seçimi məsələsinə toxundu: “Peşə məktəblərini inkişaf etdirmək istəyiriksə, bu istiqamətdə konkret addımlar atmalıyıq. Çox təəssüflər olsun ki, regionlarda yaddan çıxan peşə məktəbləri var. Əgər biz bu problemi kökündən həll etmək istəyiriksə, peşə təhsili ilə bağlı islahatları kompleks şəkildə aparmalıyıq”. Azərbaycan Respublikası Prezidenti yanında Bilik Fondu, Peşə Təhsili üzrə Dövlət Agentliyi, Təhsil nazirliyi, Ombudsman Aparatı, Əmək və Əhalinin Sosial Müdafiəsi Nazirliyinın rəsmiləri də məsələnin aktuallığını nəzərə alaraq, bu istiqamətdə köklü islahatların aparılmasının qaçılmaz olduğunu dilə gətirdilər. Tədbir maraqlı fikir və təkliflərlə davam etdi. Peşə ixtisas müəssisələrinin rəhbərləri mövcud problemlər, o cümlədən işəgötürənlərlərlə peşə məktəbləri arasında əlaqənin zəif olması və s. eyni zamanda son illərdə müşahidə olunan müsbət dəyişikliklərdən danışdılar.

Tədbirdə aidiyyatı dövlət qurumları, qeyri-hökümət təşkilatları, orta peşə ixtisas müəssisələri və kütləvi informasiya vasitələrinin nümayəndələri iştirak edirdi.