Tədbiri giriş sözləri ilə açan Əbülfəs Qarayev tədbirin Ulu Öndər Heydər Əliyevin anadan olmasının 90 illik yubileyinə həsr olunduğunu dilə gətirib: “Sərginin ilk dəfə açıq səma altında keçirilməsində məqsəd Bakı sakinləri, qonaqlar, gənclər üçün rahat və sərbəst şəkildə kitab almaq imkanı yaratmaqdır. Sərgi çərçivəsində 100-ə qədər təqdimatın keçirilməsi nəzərdə tutulur. Sərgidə 25-dən çox ölkədən 125 nəşriyyat evi öz məhsulunu təqdim edir. Bu, Azərbaycanda kitab işinə beynəlxalq marağın nəticəsidir. Belə tədbirlərin sayının artırılması vacib və önəmli hadisədir. Sərgi-yarmarkada kitablar nəinki kitab şəklində, həmçinin elektron formada təqdim edilir. Bu da müasir dünyanın ayrılmaz hissəsidir. Ümid edirik ki, bu cür sərgilərin keçirilməsi ilə gənclərin kitaba marağı daha da artacaq”.

Daha sonra baş nazirin müavini Elçin Əfəndiyev kitabın insanın ən böyük kəşfi olduğunu vurğulayıb: “Hesab edirəm ki, Qobustan qayalarındakı rəsmlərimiz ibtidai insanın bizə yadigar qoyduğu kitablardır. Ümummilli Lider Heydər Əliyev də vaxtı ilə nəşriyyatlar haqqında fərman imzalayıb. Bununla da bütün nəşriyyatlardan lisenziyalar götürülüb. Bu da kitaba və xalqa hörmətin təzahürüdür”.

Sərginin davam edəcəyi müddətdə paytaxtımızda paralel olaraq həm Azərbaycan Milli Kitabxanasının 90 illik yubileyi ilə əlaqədar tədbirlər, həm də 2 böyük nüfuzlu iclas keçiriləcək. Bunlar Avropa Milli Kitabxanaları Konfransının (CENL) XXVII illik iclası və Avrasiya Kitabxanalar Assambleyası Əməkdaşlıq Təşkilatının XV ümumi iclasıdır. İclasa 65 ölkədən nümayəndə heyəti, milli kitabxana rəhbərləri qatılacaqlar.

Qeyd edək ki, III Bakı Beynəlxalq kitab sərgi-yarmarkası işini sentyabrın 25-dək davam etdirəcək.