Korney Chukovski

MOYDODIR

(Tərcümə edəni Teymur Elçindir)

Yorğan qaçdı,

Döşəkağı

Qanad açdı.

Yastığa bax,

Qurbağa tək

Tullanaraq

Qaçdı məndən.

Əl uzatdım

Tutum şamı,

Girdi peçə;

Güldü hamı.

Götürəndə

Kitabı mən

Qorxub qaçdı

О da məndən,

Çarpayının

Altına lap

Qaçıb girdi

Tap-tap, tarap.

İstədim ki, bir çay içim,

Yaxınlaşdım samovara,

Yekəqarın, qorxu yaman,

Heç bilmədim qaçdım hara.

Nə var belə,

Nə olmuşdur?

Deyin görək

Niyə hər şey

Yerbəyerdən

Təkər kimi

Hərlənərək,

Fırlanaraq

Qaçdı birdən

Düzüldülər

Dalbadal:

ütü,

çəkmə

və qoğal,

Maşa,

çəngəl

və кәmər.

Hərlənirlər,

Fırlanırlar.

Mayallaq da

aşırlar.

 

Birdən yataq otağından

Çıxdı çolaq əlüzyuyan.

Yırğaladı başını:

 

"Bir buna bax,

Pinti uşaq.

His yaxıbsan üz-gözünə,

Utan ban, bax özünə:

Qapqarasan kömür kimi,

Boynun paslı dəmir kimi.

Əllərini görüb gendən

Şalvarın da qaçıb səndən,

Şalvarın da, şalvarın da

Qaçıb səndən.

 

Səhər-səhər yuyunurlar

Uçanlar da, qaçanlar da,

Bapbalaca siçanlar da,

Pişiklər də, ördəklər də.

Hörümçəklər, böcəklər də.

 

Təkcə sənsən çirkli qalan.

Yuyunmayan, pinti olan,

Odur qaçıb kitabların,

Ayaqqabın, corabların.

 

Mənəm

Böyük Əlüzyuyan,

Məşhur, məşhur Moydodır!

Pintiləri təmiz yuyan,

Liflərə də komandir.

 

Ayağımı döysəm yerə,

Qoşunumu çağırsam,

Neçə-neçə əlüzyuyan

Uçub gələr - bağırsam.

Səninlə bərk dalaşarlar.

 

Tutub səni,

Çimməyəni

İsladarlar

О ki, var

Sənin kimi pis uşağı.

 

Başaşağı

Ağ ləyənə vurdu qapaz,

Çığırdı bərk: "Kara-baras".

 

Tez şotkalar düşdü işə.

Çox çəkdilər məni dişə.

Hey sürtdülər bədənimi,

Oxudular:

"Kömürçünü yuyuruq biz,

Olur təmiz, olur təmiz.

Görürsünüz kömürçümüz,

Olur təmiz, olur tomiz".

 

Sabun gəldi tələsərək

Saçlarımdan yapışdı bərk

Arı kimi sancdı məni,

Çox danladı,

Sabunladı.

 

Quduz lifdən qorxdum yaman,

Vermədi heç mənə aman.

Qaçdım, qaçdım,

Elə bil ki, qanad açdım.

Keçdim neçə

Uzun küçə,

Hasar aşdım, girdim bağa,

Gəlib çatdı, başladı tez

Ac qurd kimi dalamağa.

Birdən çıxdı qabağıma

Çox sevdiyim timsah lələ,

Totuş, Kokuş yanındaydı,

Gəzirdilər gülə-gülə.

Timsah lələ

Bircə anda lifi tutdu,

Кörpә quş tək onu uddu.

O, üstümə birdən necə

Böyürdü,

Hirslənmişdi, ayağını

Döyürdü,

Dedi: "Tez ol, çıx get evə

Nədir bu

-Dedi - tez get, əl-üzünü

Təmiz yu,

-Dedi - yoxsa gəlib səni

Tutaram.

-Dedi - əzib-tapdalaram,

Udaram".

Qoyub qaçdım, qorxdum yaman,

Evimizdə gözləyirdi

Əlüzyuyan.

Sabun sürtdüm

Əl-üzümə,

Sabun sürtdüm

Üz-gözümə.

Yudum, yudum,

Yudum, yudum,

Sizdən daha nə gizlədim.

Üzümdəki, boynumdakı

Ləkələri təmizlədim.

 

Elə bu vaxt

Şalvar çıxdı yolum üstə,

Tez tullandı qolum üstə.

Dalınca da pendir-çörək

Dedi: məni tez ye görək.

Gəlib salam verdi qutab,

Düz ağzıma girdi qutab.

Bax, kitabım döndü geri

Yanında da ev dəftəri,

"Ana dili" "Hesab" ilə

Oynayırdı aşa-aşa

Eləyirdim mən tamaşa.

Bu vaxt Böyük Əlüzyuyan

Məşhur, məşhur Moydodır

Pintiləri təmiz yuyan,

Liflərə də komandir,

Qaçıb gəldi düz yanıma,

Tutdu məni, rəqs elədi,

Öpə-öpə belə dedi:

"Xoşum gəlir indi səndən

Tərifıni deyirəm mən.

Təmizlədin hisi, qırı,

Sevindirdin Moydodırı".

Pintilərə

Ayıb olsun,

Min-min kərə

Ar olsun!

Çiçək sabun,

Yumşaq dəsmal,

Narın daraq

Var olsun.

Yuyun, yuyun səhər-axşam,

Sən hər səhər, sən hər axşam

Min yaşasın

Ağ diş tozu,

Unutmayaq

Dostumuzu.

 

Gəl yuyunaq, üzək, çimək.

Baş vuraq, gəl, sulara biz

-Təknə və teşt, ləyən, çəllək,

Hər yerdə çay, bulaq, dəniz

Olsun bizim məskənimiz.

 

Vannada da, hamamda da

Bapbalaca bir camda da

Üzümüzü yuya-yuya

Biz hər yerdə, hər bir zaman

Alqış deyək, var ol deyək

Sərin suya,

Şirin suya.