Cahangir Cahangirov (1921 - 1992)

Bəstəkar, pedaqoq Cahangir Cahangirov 1921-ci il iyunun 20-də Bakının Balaxanı kəndində anadan olmuşdur. O, Asəf  Zeynallı adına Bakı Musiqi Məktəbində, Azərbaycan Dövlət Konservatoriyasında (indiki Bakı Musiqi Akademiyası)  B.Zeydmanın bəstəkarlıq sinfində təhsil almışdır.

1949-cu ildən Azərbaycan radiosunun nəzdində yaradılan xora 15 il rəhbərlik edən bəstəkarın yazdığı mahnıların çoxu ilk dəfə elə bu kollektivin ifasında səslənib. Habelə o, Azərbaycan Dövlət Filarmoniyası nəzdindəki Mahnı və Rəqs Ansamblının bədii rəhbəri vəzifəsində çalışıb. Solist, xor və simfonik orkestr üçün "Arazın o tayında" vokal-simfonik poemasının (1949), "Dostluq haqqında mahnı" (1956), "Füzuli" (1959), "Nəsimi" (1973) kantatalarının, "Sabir" (1962), "Hüseyn Cavid-59" (1984), "Böyük qələbə" (1985) oratoriyalarının, "Azad" (1957), "Xanəndənin taleyi" (1978) operalarının və digər əsərlərin müəllifidir.

Əməkdar incəsənət xadimi (1959), xalq artisti (1963), SSRİ dövlət mükafatı laureatı (1950) Cahangir Cahangirov 1992-ci ilin martında vəfat edib.