|
|
|
|
Şüvəlan qəsəbəsində Təhsil Nazirliyi tərəfindən tikilmiş ailə əsaslı kiçik qrup evi istifadəyə verilib
-
Şriftin ölçüsü
decrease font size
şrift böyüt
- Çap et
Bakının Xəzər rayonunun Şüvəlan qəsəbəsində Təhsil Nazirliyi tərəfindən tikilmiş ailə əsaslı kiçik qrup evi istifadəyə verilib. Nazirlikdən APA-ya verilən məlumata görə, kiçik qrup evi “Azərbaycan Respublikasında dövlət uşaq müəssisələrindən uşaqların ailələrə verilməsi (De-institusionalizasiya) və alternativ qayğı Dövlət Proqramı (2006-2015-ci illər)”nın icrası istiqamətində Təhsil Nazirliyi ilə “Hilfsverk Avstriya” beynəlxalq təşkilatı tərəfindən həyata keçirilən “Himayədar (foster) qayğı və ailə əsaslı xidmətlər üzrə modelin işlənib hazırlanması” layihəsi çərçivəsində yaradılıb. Kiçik qrup evinin yaradılmasında məqsəd övladlığa və ya himayədarlığa verilənədək uşağa ev şəraitində fərdi və inkişaf planında nəzərdə tutulmuş qaydada qayğı göstərməkdən ibarətdir.
Dövlət uşaq müəssisələrindən kiçik qrup evində yaşayacaq 8-13 yaş arasında 10 nəfər qız seçilib. Uşaqlar ailə mühiti yaradılmış kiçik qrup evində yaşamaqla yanaşı, evə yaxın ərazidə yerləşən ümumi təhsil məktəbində təhsillərini davam etdirəcək və tərbiyəçilər 24 saat ərzində onların təlim-tərbiyəsi ilə məşğul olacaqlar. Dövlət uşaq müəssisəsindən fərqli olaraq, Kiçik qrup evində uşaqların ayrıca yataq otaqları, fərdi əşyaları, kompüter və yazı masaları var. Məlumata əsasən, evin saxlanması xərcləri bir il ərzində layihəyə ayrılmış vəsait hesabına həyata keçiriləcək. Layihə başa çatdıqdan sonra bu evin saxlanması xərclərinin dövlət büdcəsindən ayrılmış vəsait hesabına ödənilməsi nəzərdə tutulub. Bu məsələlərin tənzimlənməsi üçün “Kiçik qrup evinin nümunəvi əsasnaməsi” hazırlanıb, baxılıb və təsdiq edilmək üçün Nazirlər Kabinetinə təqdim olunub.