Autizm uşaqlarda irsi və ətraf mühit amillərinin təsirindən beyində yaranıb inkişaf edən çatışmazlıqları ifadə edən ümumi termindir. Autizm üç yaşından əvvəl başlayan və məhdud davranışlara gətirib çıxaran, beyinin inkişafına maneə törədən bir xəstəlikdir. Bu baxımdan ilkin diaqnoz çox önəmlidir. Valideynlərin uşağın davranışlarını müşahidə etməsi, bəzi problemləri erkən nəzərə almaları üçün keçirilən aksiya diqqəti məhz bu məsələyə yönəldir. Aparılmış tədqiqatlara görə, dünya əhalisinin 1 faizi - 70 milyon əhali autizmin qurbanlarıdır. Xəstəliyin artım sürəti narahatlıq doğurur. Hesablamalara görə, bu il autizm xəstəsi olan uşaqların sayı QİCS, diabet və xərçəng xəstəliklərinə yoluxanların ümumi cəmindən artıq olacaq. Qeyd olunub ki, autizmin müalicəsi üçün hələlik heç bir tibbi vasitə yoxdur, lakin erkən diaqnoz qoyma xəstəliyin fəsadlarını müəyyən dərəcədə azaltmağa imkanı yaratdığından gənc valideynlərin daha diqqətli və xəstəlik barədə daha geniş məlumatlı olması zəruridir.