Noyabrın 21-də Mərkəzdə yetkinlik yaşına çatmayanlarla profilaktik işin təşkili bölməsinin nümayəndələri, Bakı Şəhəri üzrə Təhsil İdarəsinin əməkdaşları, Bakı şəhər DYP İdarəsinin məsul şəxsləri, məktəb, məktəbəqədər və məktəbdənkənar tərbiyə müəssisələrinin uşaq və müəllimləri, valideynlər və KİV təmsilçilərinin iştirakı ilə yol qəzalarının qurbanlarının xatirəsi bir dəqiqəlik sükutla yad edildi. Sonra millət vəkili Elmira Axundova Respublikanın bütün məktəblərini Mərkəzdə keçirilən yol hərəkəti qaydaları məşğələlərinə cəlb etməyin vacibliyini və bu məqsədlə regionlardan uşaqların Mərkəzə gəlməsi üçün avtobusların ayrılacağını qeyd etdi. Bakı Şəhəri üzrə Təhsil İdarəsinin rəis müavini M.Bayramov əksər ailələrdə yol qəzalarında zərərçəkənlərin olduğunu və təhlükədən uzaq olmaq üçün kiçik yaşlarından uşaqlara yol qaydalarının aşılanmasının zəruriliyini dilə gətirdi. DYP əməkdaşları hər kəsi qanunlara riayət etməyə çağırdı, yol qəzaları qurbanlarının yaxınları isə faciənin ağırlığını tədbir iştirakçılarının diqqətinə çatdırdı. Sonda tədbir iştirakçıları Yol Qəzaları Qurbanlarının Xatirəsinə həsr olunmuş foto-sərgi və stendlərə baxış keçirdilər.