Səhifəni çap et
Cümə, 31 Avqust 2018 10:15

“Oqtay müəllimin ruhu mahnılarında yaşayır”

Oqtay-Zulfuqarov-elsBu gün bəstəkar Oqtay Zülfüqarovun anım günüdür

“Həyatda nə işlə məşğul olmağınızdan asılı olmayaraq bunu ürəkdən edin”. Qədim Çin mütəfəkkiri və filosofu Konfutsinin bu düşüncəsinə parlaq misal böyük şəxsiyyət, dahi bəstəkar, uşaq musiqi dünyasını rəngarəng və ecaskar əsərləri ilə zənginləşdirən Oqtay müəllim Zülfüqarovun həyat və yaradıcılığıdır. 500-dən artıq uşaq mahnılarının müəllifi ömrünün 60 ilindən çoxunu milli musiqimizi təbliğ edir, gənc nəslin mədəni-mənəvi inkişafı üçün çalışmışdır. Ruhu olmayan insan nə böyük şəxsiyyət, nə də böyük sənətçi ola bilər. Oqtay müəllimin ruhu onun mahnılarıda yaşayır.

Bu günbəstəkarın ölümündən iki il ötür. Oqtay müəllimin yoxluğunu ailə üzvləri, ömür-gün yoldaşı İnara xanım, övladları, nəvələri ilə birgə biz də yaşayırıq və ömrünün son 5 ilində bizimlə doğmalaşan, səmimi insan, dostumuz və müəllimimizə deyəcək sözlərimiz çoxdur:

“Oqtay müəllim, təəssüflər olsun ki, biz Sizi çox gec tanıdıq. Uşaqlığımız mahnılarınızla keçsə də, Sizi şəxsən tanımaq şərəfi bizlərə çox gec nəsib oldu. Sizinlə bağlı xatirələrimiz çoxdur. Çiyin-çiyinə çalışdığımız layihələr zamanı tükənməz enerjiniz, səmimiliyiniz və həyatsevərliyiniz bizi heyran etməyə bilməzdi. Yeni uşaq mahnıları-2013” layihəsi zamanı ecaskar musiqi aləminə səyahət edərkən Sizi nə vaxtsa itirəcəyimizi, haqqınızda keçmiş zamanda danışacağımızı ağlımıza belə gətirə bilməzdik. Müsabiqəyə gələn mahnıların seçim turlarında vaxt elə tez keçirdi ki…Kaş ki, həmin zamanı tutub saxlaya bilərdik…Deyirlər əvəzolunmaz insan yoxdur, təkrarolunmaz insanlar var. Sizin milli musiqi xəzinəsinə bəxş etdiyiniz mahnılarla hələ neçə-neçə nəsil boya-başa çatacaq və Sizi yad edəcəklər.

Ruhunuz şad olsun”!

“ELS” Müstəqil Araşdırmalar Mərkəzinin kollektivi

Oxunub 1680 dəfə