Telekanallarda uşaq verilişlərinə ayrılan vaxtın müqayisəsi göstərmişdir ki, uşaqlar üçün gündəlik axşam verilişlərinin translyasiya ənənəsini 2011-ci ildən bugünədək yalnız İTV həyata keçirir. Tədqiqat müəyyən etmişdir ki, bir çox telekanallarda uşaq verilişləri həftə ərzində efirdə qeyri-bərabər paylanılır və əsasən günün birinci yarısında göstərilir..

İctimai müzakirələr zamanı millət vəkili Kamilə Əliyeva Azərbaycanda uşaq siyasəti ilə bağlı qəbul olunmuş onlarla qanun və qərarlara baxmayaraq bu gün ölkə ərazisində yayımlanan telekanallarda vəziyyətin acınacaqlı olduğunu dedi. Onun sözlərinə görə, uşaqların yaşına uyğun verilişlər hazırlanmalı və burada ilk növbədə vətənpərvərlik mövzusu prioritet təşkil etməlidir. Millət vəkili vəziyyətdən çıxış yolunu Dövlət Uşaq Telekanalının açılmasında görür.  

İctimai Televiziyanın Proqram Departamentinin direktoru Abbas Rüstəmov isə bildirdi ki, təmsil etdiyi telekanalın efirində kifayət qədər uşaq mövzusu işıqlandırılır ki, bu da “ELS”-in monitorinqinin nəticələrində öz əksini tapmışdır.

Prezident Administrasiyasının təmsilçisi Vüqar Səlimov “ELS”-in bağlanğıclarına hər zaman dəstək verdiyini deyərək, bu cür tədqiqatların həyata keçirilməsini təqdirəlayiq hesab etdiyini və bu istiqamətdə ictimai qurumlarla dövlət strukturlarının birgə fəaliyyət göstərməli olduğunu vurğuladı.

Maraqlı fikir mübadiləsi ilə yadda qalan Dəyirmi Masanın sonunda ölkə Prezidentinə Dövlət Uşaq Televiziyasının açılması, Uşaq Siyasətinə dair Milli Strategiyanın qəbulu və Uşaq mədəniyyəti sahəsində Müstəqil Təşəbbüslərə Dəstək Fondunun yaradılması ilə bağlı müraciətlər qəbul olundu.

Qeyd edək ki, ictimai müzakirələrdə Prezident Administrasiyası, Ombudsman Aparatı, aidiyyatlı dövlət qurumlarının nümayəndələri, telekanalların Proqram Departamentlərinin rəhbərləri, tanınmış incəsənət xadimləri, qeyri-hökümət təşkilatları və KİV təmsilçiləri iştirak etmişlər.