Qeyd edək ki, bəstəkarın yubileyinin keçirilməsi “ELS” Müstəqil Araşdırmalar Mərkəzinin səyi nəticəsində mümkün olmuşdur. İyunun 6-da Müstəqil Araşdırmalar Mərkəzinin “Uşaq mahnıları: dünəni, bu günü, sabahı” mövzusunda keçirdiyi Dəyirmi masada ölkənin tanınmış incəsənət xadimləri tərəfindən Azərbaycan milli musiqisinin inkişafında mühüm xidmətləri olan, ilk qadın bəstəkar Ağabacı Rzayevanın 100 illik yubileyinin dövlət səviyyəsində keçirilməsi xahişilə ölkə başçısına müraciət qəbul olunmuşdur.
Yubiley gecəsində bəstəkarın əsərləri, o cümlədən romans və instrumental pyeslər, xalq mahnıları tanınmış sənətçilərin ifasında səslənəcək. Azərbaycan Dövlət Uşaq Filarmoniyası və Azərbaycan Dövlət Televiziyasının “Bənövşə” uşaq xorunun solistləri Ağabacı Rzayevanın bu gün də sevilən “Kukla”, “Gənc dənizçi”, “Qaranquş”, “Sabahın ustaları” kimi uşaq mahnılarını ifa edəcəklər.